LEGANES, ILOILO – Ginareklamo sang meat vendors sa Leganes Public Market ang mga illegal meat vendors nga nagabaligya sa higad sang highway sa Leganes, Iloilo.
Sa interview sang Bombo Radyo sa meat vendor nga nagpahinago lang sa pangalan nga Neneng, iya ginpahayag nga ginabanta nga 36 lang ang makabig nga legal meat vendor sa merkado publiko sang Leganes.
Suno kay Neneng, ginhatagan lamang sang kahigayunan ang mga vendor nga makabaligya sa higad sang dalan sang ginpatuman ang lockdown apang sa subong nga amat-amat na nga nagabalik sa normal ang sitwasyon, kun tani, regulated ang kadamuon sang mga manugbaligya.
Ginpahayag ni Neneng nga tuman ka damo ang illegal meat vendor nga nagapwesto sa higad sang highway padulong sa banwa sang Zarraga kag wala na ginasunod ang physical distancing.
May kaangtanan diri, may yara naman sang petition letter ang mga market vendor para kay Mayor Vicente Jaen II apang suno sa alkalde, magahatag siya sang official statement sa masunod nga semana.
