ILOILO CITY – Ipasirado ang tanan nga commercial establishments nga nagatanyag sang non-essential services.
Ini ang ginpahayag sa Bombo Radyo ni Public Safety and Transportation Management Office head Jeck Conlu kasunod sang ginpaguwa nga Executive Order ni Mayor Jerry Treñas may kaangtanan sa panibag-o nga quarantine classification sa syudad sang Iloilo epektibo Setyembre 24 tubtub Oktubre 9.
Suno kay Conlu, temporaryo anay nga maga-untat ang negosyo sang non-essential services bangud nga ginpaidalom sa Modified Enhanced Community Quarantine ang syudad sang Iloilo bangud sa nagasaka nga COVID-19 cases.
Ginpahayag ni Conlu nga ipatuman man ang total liquor ban kag ang curfew nga maga-umpisa sa 9:00 sang gab-i tubtub 4:00 sa kaagahon apang wala sang border restrictions nga ipatuman kag magapadayon ang byahe sang mga de-pampasahero nga salakyan.
Ginadumili-an man ang pagpatigayon sang mass gathering lakip na diri ang travel limitation sa mga may yara sang balati-an, senior citizens, mga nagabusong kag mga naga-edad sang below 21 years old.
Magluwas diri, ipa-untat man sang 15 days ang pagbaton sang mga Returning Overseas Filipinos kag Locally stranded Individuals.
Nahibalu-an nga nakasaad sa Executive Order no. 149 nga naga-amyendar sa Executive Order no. 140 nga lakip sa mga negosyo ipasirado amo ang bulangan, beerhouse, children’s amusement industries, barbershops kag salon, mga nagatanyag sang personal care kag aesthetic procedures, gyms kag fitness studios lakip na ang sports facilities, testing kag tutorial services, review centers, internet cafe, drive in cinemas, pet grooming business, language, driving, acting kag voice schools, entertainment industries, libraries, archives, museums kag cultural centers, tourist destinations, travel agencies, tour operators kag reservation services, tattoo and body piercing kag live events.
