ILOILO CITY – Masobra sa 200 ka panibag-o nga COVID-19 cases kag recoveries samtang 23 naman ka dugang nga deaths ang na record sang Department of Health Region 6 sa bug-os nga Western Visayas.
Santo sa September 24 nga case bulletin sang nasambit nga ahensya sang gobyerno, naglab-ot sa 260 ka panibag-o nga COVID-19 cases samtang 234 naman ka recoveries ang nagdugang sa listahan.
Sa pangkabug-usan, 10,234 na ang total COVID-19 cases sa rehiyon kun sa diin 3,699 diri ang active cases, naglab-ot naman sa 6,327 ang numero sang mga pasyente nga nag-ayo samtang 208 na ang ginbawi-an sang kabuhi.
Sa 260 ka panibag-o nga kaso, 1 ang halin sa Aklan, 1 sa Antique, 7 sa Capiz, 2 sa Guimaras, 19 sa Iloilo, 62 sa Negros Occidental, 95 sa Bacolod City kag 73 sa Iloilo City.
Sa 1,556 ka laboratory results nga ginpaguwa sa nasambit nga adlaw, 260 ang new cases, 4 ang nagpositibo sa repeat test samtang 1,292 naman ang negatibo.
Sa subong, nagsaka na sa 82 ang COVID-19 cases sa Aklan, 39 sa Antique, 282 sa Capiz, 69 sa Guimaras, 763 sa Iloilo Province, 1,817 sa Negros Occidental, 3,269 sa Bacolod City, 2,037 sa Iloilo City, 1,877 sa ROFs, LSIs kag APORs kag 38 ang sa Tagged to other regions.
