ILOILO CITY – Wala na sang may nasalbar nga gamit ang pamilya Pineda sa sunog nga nagluntad sa Brgy. Rizal Estanzuela, Iloilo City.
Sa interview sang Bombo Radyo kay Mary Jane Pineda, iya ginpahayag nga tanan nila nga gamit ang naupos sa sunog.
Suno kay Pineda, bangud nga totally burned ang iya balay, sa multi-purpose gym na lang sila nagtulog nga magpamilya.
Ginpahayag ni Pineda nga sang nakita nila ang naga-ibwal nga kalayo, ginsapar na lang nila sa pagluwas ang mga kabataan nga miyembro sang pamilya.
Apisar sang kabudlay, ginpahayag sang natungdan nga iya na lang nga ginapasalamatan nga wala sang may ginbawi-an sang kabuhi sa iya mga himata.
Suno naman kay Candelaria dela Flor, partially damaged ang iya balay apang sa pihak sini, nagapasalamat siya bangud nga udto natabo ang sunod kag indi gab-i.
Ginpahayag ni dela Flor nga kun sa gab-i natabo ang sunog, mahimo nga madamo ang ginbawi-an sang kabuhi.
Sang nakita niya ang kalayo, ginpahayag sang natungdan nga wala na siya sang may ginsapar nga gamit kag bangud sa kakulba, naglain ang iya pamatyag.
