ILOILO CITY – 100% ready ang Department of Education sa pagbukas sang klase sa Oktubre 5.
Sa interview sang Bombo Radyo kay Dr. Lea Belleza, Program Supervisor kag tagpamaba sang Department of Education Region 6, iya ginpahayag nga sa subong, natapos na ang reproduction kag nakahanda na para sa distribution ang modules, nakapatigayon naman sang simulation exercise sa nagkalain-lain nga modalities lakip na diri ang orientation sa mga ginikanan kag estudyante kag nakapaidalom naman sa training ang mga manunudlo.
Suno kay Belleza, sa public school, 97.15% ang enrollment rate humalin sa Kindergarten tubtub sa Senior High School samtang 64.16% naman sa private school.
Ginpahayag ni Belleza nga apisar nga wala sang face-to-face classes apang lauman sa Oktubre 5 nga may yara sang flag ceremony sa 7:00 sang aga kasubong sa kinaandan.
Antes pa man nagpa-enroll, ginpahayag sang natungdan nga ginpaathagan ang mga ginikanan kag ang estudyante kun ano nga modality ang nagakabagay santo sa ila lokasyon.
Bangud nga sa konsiderasyon, nagabaton pa sang enrollees ang ahensya basta makumpleto lang sang estudyante ang 80% attendance tubtub sa katapusan sang school year.
