ILOILO CITY – Tuman ka importante ang Barangay Justice System ukon Katarungang Pambarangay.
Sa pagpaathag sang Bombo abogado nga si Atty. Joenar Pueblo, ang Barangay Justice System ang isa ka good law nga may katuyu-an nga mahitso ang problema sa barangay level pa lang.
Suno kay Atty. Pueblo, kun mahitso gilayon ang problema sa magtimbang nga bahin, indi na kinahanglan pa nga maglab-ot sa kasuhay sa korte.
Ginpahayag ni Atty. Pueblo nga ang Barangay Justice System ang ginabug-usan sang 10-20 ka miyembro ukon ginatawag nga Lupon nga ginalakipan sang mga respetado kag may integridad nga mga indibidwal sa pagpamuno sang Punong Barangay.
Tuman ka importante ang certification to file action nga pirmado sang Punong Barangay bangud nga ini ang ginabasehan sang korte kun bala magapadayon ang kaso ukon indi.
