CALOOCAN CITY, METRO MANILA – Wala na sang kabuhi sang nasapwan ang duha ka nurse kag isa ka estudyante sa sulod sang ginatiniran nga balay sa Catmon Street, Amparo Village, Caloocan City.
Ang mga biktima amo sanday Glydyl Belonio, 23 anyos sang Maspasan, Calinog, Iloilo, John Arjay Sarmiento Belencion, 23 anyos, sang Brgy. Nalbugan, Calinog, Iloilo kag Muslim nga si certain Mona nga isa man ka nurse.
Sa interview sang Bombo Radyo kay Rosemarie Belonio, iya ginpahayag nga ginpahibalo lang siya tuhoy sa natabo sa iya anak nga si Glydyl kag himata nga si John Arjay.
Suno kay Belonio, yara siya naga-istar sa San Mateo, Rizal samtang sa balay naman sang iya tiya sa Caloocan nagatinir si Glydyl kaupod ang duha pa ka mga biktima.
Ginpahayag ni Belonio nga brutal ang natabo bangud naka-angkon sang multiple stab wounds ang mga biktima matapos ginsulod sang wala pa makilala nga suspek.
Antes pa man sini, ginpahayag sang natungdan nga may yara sang contruction workers nga nagatrabaho sa balay nga ginatiniran sang tatlo.
Bangud nga indi kuntento ang tag-iya sa pagtrabaho sang construction workers, nagkuha siya liwat sang kontraktor nga amo ang magatapos sang balay.
Ginapahayag nga si John Arjay amo ang nakabaton sang pamahog kag naulamid ang duha ka nurse.
Nagaguwa sa imbestigasyon sang otoridad nga wala sang forcible entry sa balay kag duha ka sahi sang patalum ang gingamit sa pagpatay sa mga biktima apang indi pa matumod kun pila ka bilog ang suspek.
Sa subong, hustisya ang ginasinggitan sang pamilya sang mga biktima.
