OTON, ILOILO – Na record sang Local Government Unit sang Oton, Iloilo ang pinakamataas nga single-day COVID-19 cases.
Sa interview sang Bombo Radyo kay Jafet Salinas, focal person for COVID-19 sa nasambit nga banwa, iya ginpahayag nga naglab-ot sa pito ka COVID-19 cases ang na record sang damlag lang.
Bangud sini, ginpahayag ni Salinas nga nagsaka na sa 138 ang COVID-19 cases sa banwa sang Oton apang 22 na lang ang active samtang 3 na ang ginbawi-an sang kabuhi.
Ginpahayag ni Salinas nga ang iban sa mga pasyente ang asymptomatic kag nagatinir sa quarantine facility.
Kun COVID-19 situation sa Oton ang paga-istoryahan, ginpahayag sang natungdan nga temporaryo nga ginsirado ang isa ka daku nga subdivision kun sa diin na record ang mataas nga kaso sang virus.
May kaangtanan diri, istrikto ang ginapatuman nga travel monitoring kag checkpoint sa nasambit nga banwa.
