MANILA – Target sang Philippine Basketball Association nga umpisahan ang 46th season sa Abril sa masunod nga tuig.
Ini agud nga mahatagan sang kahigayunan ang PBA players nga mangin available matapos ang pagpakigbahin sang national team sa FIBA Asia Cup 2021 qualifiers sa Pebrero.
Suno kay PBA Commissioner Willie Marcial, ang 45th season ang ginalauman nga magatapos sa mid-December kag ang Samahang Basketbol ng Pilipinas mismo ang nagpahibalo tuhoy sa FIBA qualifiers sa Pebrero apisar nga gin-anunsyo sang FIBA nga ang continental qualifiers ang patigayunon sa Nobyembre subong nga tuig kag sa February 2021.
Apisar sini, ginpasalig ni Marcial nga all out support ang PBA sa Gilas Pilipinas.
Nahibalu-an nga ang 45th season sang PBA ang gin-untat sa sulod sang anum ka bulan bangud sa COVID-19 pandemic kag isa lamang ka game ang natigayon sa tunga sang San Miguel Beermen kag Magnolia Hotshots antes ang suspension sang Marso.
Ang liga ang maga-umpisa sa Oktubre 11 apang kinahanglan sang PBA ang approval sang Inter-Agency Task Force kag kun pahanugutan, ang hampang ang patigayunon sa Clark Freeport Zone.
