ILOILO – Nabaton na sang Discipline, Law and Order Section sang Regional Personnel and Records Management Division sang Police Regional Office 6 ang pre-charge investigation batok sa anum ka police trainees nga naaktuhan nga naga-inom sang makahulubog nga ilimon sa Sara, Iloilo sang Setyembre 12.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga may yara sang probable cause rason nga ang anum ka police trainees ang magapangatubang sang administrative cases nga simple neglect of duty, simple misconduct kag conduct unbecoming of a police officer kun sa diin dismissal ang pinakamataas nga silot.
Ang anum ka police trainees suno kay Malong ang naglapas sa Article 151 sang Revised Penal Code in relation to Municipal Executive Order 025-B section 7 kag sa Presidential and PNP directive.
Bangud sini, may yara na sang summary hearing officer nga gin-assign ang Discipline, Law and Order Section para sa kaso sang anum ka police trainees nga nagapabilin sa gihapon sa Regional Personnel Holding and Accounting Unit.
Nahibalu-an nga naaktuhan mismo sang mga katapo sang Sara Municipal Police Station ang anum ka babayi nga police trainees nga nagapahubog sa isa ka kalan-an sa banwa sang Sara.
Ang mga nadakpan amo sanday:
- Pat. Jean Tiongco, 25 anyos
- Pat. Jeseel Cordivito, 26 anyos
- Pat. Ma. Lorena Semilla, 26 anyos
- Pat. Rose May Ogboc, 21 anyos
- Pat. Shane Grijaldo, 26 anyos
- Pat. Pearl Joy Araneta, 25 anyos
Ang anum ang lunsay taga Negros Occidental kag nagapaidalom sa Basic Internal Security Operations Course.
