ILOILO CITY – Status quo anay ang guidelines may kaangtanan sa pagpauli sang mga Returning Overseas Filipino Workers kag Locally Stranded Individuals sa syudad sang Iloilo.
Ini ang ginpahayag sa Bombo Radyo ni Public Safety and Transportation Management Office Head Jeck Conlu nga nagaserbe man nga COVID-19 team spokesperson sang Iloilo City Government.
Suno kay Conlu, mangin epektibo sa gihapon ang kaundan sang daan nga guidelines tubtub nga wala pa ang approval sang Inter-Agency Task Force tuhoy sa bag-o nga Executive Order nga ginpirmahan ni Mayor Jerry Treñas.
Ginpahayag ni Conlu nga sa subong, pagasundon anay ang pagpaidalom sa 14 ka adlaw nga facility quarantine kag kinahanglan man nga magpaidalom sa RT-PCR test.
Nahibalu-an nga santo sa bag-o lang ginpaguwa nga Executive Order 155 sang alkalde, kinahanglan nga may yara sang negative RT-PCR test results within 72 hours ang mga magapauli nga Ilonggo kag kinahanglan nga magpaidalom sa 5 ka adlaw nga strict home quarantine.
Anum ka mga barangay sa syudad sang Iloilo ang ginaduso nga ipaidalom sa surgical lockdown epektibo subong nga adlaw bangud sa mataas nga numero sang COVID-19 cases.
Ang mga barangay amo ang:
-North San Jose, Molo
-Sooc, Arevalo
-Jalandoni Estate, Lapuz
-Bo. Obrero, Lapuz
-Camalig, Jaro,
-Democracia, Jaro
Samtang, posible naman nga dulaon na ang surgical lockdown sa duha ka mga barangay nga nalakip sa 23 ka mga mga lugar nga una nga ginpaidalom sa surgical lockdown bangud sa mataas nga COVID-19 cases.
Ang McArthur, La Paz kag Q. Abeto, Mandurriao ang posible nga dulaon na sa listahan bangud nga sa nakaligad nga inadlaw, wala na sang may na record nga COVID-19 cases.
