USA – Mahimo nga maapektuhan ang pagpangampanya ni US President Donald Trump sa tion nga indi siya maka-recover matapos malatnan sang COVID-19.
Ini ang kasunod Twitter post ni Trump kun sa diin nakasaad nga magluywas sa iya, nagpositibo man sa COVID-19 ang iya tiayon nga si Melania kag sa subong, nagapaidalom na sila sa quarantine.
Suno kay Bombo International Correspondent Raffy Fernando, kinahanglan nga maka-recover gilayon si Trump agud nga makapadayon sa pagpangampanya kag agud nga makatambong sa palaabuton pa nga debate batok kay anay Vice President kag Democratic Presidential nominee Joe Biden.
Ginpahayag ni Fernando nga kun indi maka-recover ang US President, lauman nga ang mga supporters amo ang magahimakas sa pagpangampanya kag mahimo man nga mas pasangkaron ni Trump ang online campaign samtang nagahilapit ang November 3 nga eleksyon.
Isa man sa pagalauman amo nga may yara sang adjustment sa petsa sang debate sa tunga sang duha ka kandidato bangud nga sa una nga hugnat sang Presidential debate, kasubong nga wala naathagan ang publiko bangud nga personal na ang ginabuy-an nga akusasyon nanday Trump kag Biden.
Apisar sang nasambit nga kumpirmasyon, ginpahayag sang natungdan nga wala na ini ginkakibot sang Americans bangud nga madamo na nga mga opisyal sa US ang nalatnan sang virus kag indi man imposible nga malatnan ang US President.
Sa subong, 7,499,991 na ang COVID-19 cases sa Estados Unidos, 212,726 ang patay samtang 4,737,374 ang naka-recover.
