Proteksyon sa mga staff, rason sang WVMC kun ngaa gina-require ang isa ka pasyente sa pagpapa-idalom sa RT-PCR test

Proteksyon sa mga staff ang rason sang Western Visayas Medical Center kun ngaa gina-require ang pagpaidalom sa RT-PCR test sa isa ka pasyente lakip na sa mga nagabusong.

Sa interview sang Bombo Radyo kay Richard Saltin, designated spokesperson sang ospital, iya ginpahayag nga kabahin na sang protocol sang ospital nga ipa-idalom sa RT-PCR test ang mga pasyente bangud ang iban sa ila mga staff ukon health workers ang nagpositibo na sa COVID-19.

Suno kay Saltin, madamo sang mga asymptomatic patients ang nagasulod sa ospital kag may mga insidente sadto nga wala nakitaan sang sintomas sang COVID-19 ang isa ka pasyente sa diin ginbutang ini sa NON-COVID ward apang sang ginkuhaan sang swab sample, nagpositibo sa virus.

Dugang pa sang natungdan, indi lamang ang mga staff sang ospital ang gina-ulikdan kundi amo man ang iban nga mga pasyente kag ila tagsa ka mga komunidad.