GUIMARAS – Kapin sa 100 na ang nahatagan sang citation ticket bangud sa paglapas sa New Normal Ordinance sa probinsya sang Guimaras.
Ang Provincial Ordinance No. 2020-04 ukon “An Ordinance Prescribing for Measures and Policies Against Emerging and Re-Emerging Infectious Diseases in the Province Thereby Establishing the “New Normal” in Connection Therewith” ang gin-introduce nanday Vice Governor Atty. John Edward Gando, Majority Floor Leader Cyril Beltran kag Sangguniang Panlalawigan Member Josefina De La Cruz nga chairperson sang Committee on Health.
Sa programa Dura Lex Sed Lex, ginpahayag ni Gando nga ang nasambit nga ordinansa ang nangin epektibo sang Setyembre 8 kag as of October 2, naglab-ot na sa 96 ang violators.
Suno kay Gando, nakasaad sa nasambit nga ordinansa ang mga minimum health protocol nga dapat sundon sang mga Guimarasnon lakip na sang mga nagapadulong sa isla bilang pangaman batok sa COVID-19.
Ginpahayag ni Gando nga lakip diri amo ang pag fill-up sang health declaration card para sa inbound kag outbound pass kag kasubong sa iban nga mga lugar, istrikto man nga ginapatuman ang pagsuksok sang face mask kag ang social/physical distancing measure.
Nakasaad man sa New Normal Ordinance kun ano ang penalty sa tagsa ka violation kag kun ano ang dapat nga himuon sang violator sa tion nga mahatagan na sang citation ticket.
Sa tion nga wala sang settlement nga matabo sa gintalana nga oras, ginpahayag sang Bise Gobernador nga mahimo nga magpangatubang sang nagakaigo nga kaso ang violator.
