ILOILO CITY – Daku ang mabulig sang mind conditioning sa kabataan may kaangtanan sa pagbukas sang klase sa mga pampubliko nga eskwelahan humalin sa Kindergarten tubtub sa Senior High School.
Ini ang pahayag ni Dr. Lea Belleza, Program Supervisor kag Spokesperson sang Department of Education Region 6, may kaangtanan sa pag-umpisa sang klase subong nga adlaw, Oktubre 5.
Sa interview sang Bombo Radyo kay Belleza, iya ginpahayag nga 100% na nga ready ang ahensya agud mangin tayuyon ang pagpatigayon sang mga programa kasubong sang simultaneous nga flag raising ceremony, official declaration ni DepEd Sec. Leonor Briones, Teacher’s Prayer para sa pagsaulog sang World Teacher’s Day subong man nga adlaw kag ang pagpatigayon sang nanari-sari nga programa paagi sa online.
Suno kay Belleza, magluwas sa pagpanghanda sang ahensya, nagakadapat nga nakondisyon na ang mga estudyante tuhoy sa new normal nga pagpatigayon sang pagtudlo.
Ginpahayag ni Belleza nga daku ang mabulig sang mga ginikanan sa pagtudlo kag pagpahangop sa ila kabataan agud nga malikawan ang ano man nga sahi sang problema.
May kaangtanan naman sa naga-viral nga video sa social media tuhoy sa mga problema sa blended learning, ginpahayag sang natungdan nga sa baylo nga i-post, mas makapaayo nga ipalab-ot ini sa mga manunudlo ukon sa school authorities.
