ILOILO – Daku nga pagpanghangkat para sa volunteer learning facilitators kag mga ginikanan ang pagpatigayon sang home-based learning.
Sa interview sang Bombo Radyo kay Dr. Roel Bermejo, Schools Division Superintendent sang Department of Education-Iloilo, iya ginpahayag nga ang volunteer learning facilitators amo ang magabulig kun ang ginikanan ang nabudlayan sa pagtudlo sa ila kabataan kun paano sabtan ang self-learning modules.
May kaangtanan diri, ginpahayag ni Bermejo nga wala pa sang may nabaton nga reklamo ang Department of Education may kaangtanan sa kakulang sang volunteer learning facilitators kag kabahin na sang contingency plan nga kun wala sang may makuha nga volunteer professionals, ang manunudlo mismo amo ang magaserbe nga learning facilitators.
Sa pagkamatuod suno kay Bermejo, magapaguwa pa sang guidelines ang DepEd central office may kaangtanan sa hiring sang para-teachers ukon professionals gikan sa nagkalain-lain nga patag nga amo ang magaserbe nga manunudlo.
