ILOILO CITY – Siyam ang nagdugang sa listahan sang mga nagpositibo sa COVID-19 sa Brgy. Bolilao, Mandurriao, Iloilo City.
Sa interview sang Bombo Radyo kay Punong Barangay Joy Salfin, iya ginpahayag nga sang Oktubre 3, 18 ang ginkuhaan sang swab sample para sa COVID-19 test apang siyam ang una nga nakumpirma nga nagpositibo sa virus samtang ang resulta sang iban ang ginahulat pa tubtub subong.
Suno kay Salfin, ang nagdugang nga mga COVID-19 positive ang bunga sang contact tracing kag ang kalabanan sa ila ang yara na sa quarantine facility.
Ang iban naman nga nagpositibo ang nagapaidalom na lang sa strict home quarantine rason nga gin-surgical lockdown ang tatlo ka sitio nga ginalakipan sang Dike 1, Brook Side kag Malipayon.
