ILOILO CITY – Mangin epektibo na sa masunod nga semana ang gin-amyendaran nga ordinansa tuhoy sa mandatory nga pagsuksok sang face mask kag face shield ukon eye protector sa syudad sang Iloilo.
Sa interview sang Bombo Radyo kay Iloilo City Councilor Ely Estante, proponent sang nasambit nga ordinansa, iya ginpahayag nga ang publication period ang gintalana sang Setyembre 28 tubtub Oktubre 4.
Suno kay Estante, kun sang Oktubre 4 gin-publish ang gin-amyendaran ang ordinansa, mahimo nga sa Oktubre 19 man ini mangin epektibo ukon 15 ka adlaw matapos ang publication.
Ginpahayag ni Estante nga sa 1st offense, P1,000 ang multa kag community service, sa second offense naman, P3,000 ang multa kag community service samtang sa third offense, P5,000 ang multa kag community service.
Ang community service suno sa Konsehal ang nakadepende sa kabug-aton sang offense nga nahimo kag ang magpakatig-a sa pagbayad sang multa kag sa pagpaidalom sa community service ang pasakaan sang nagakaigo nga kaso.
Ang Office of the City Mayor na ang in-charge sa pagpabayad sang multa, paghatag sang community service kag pagpasaka sang kaso batok sa violator.
