LAMBUNAO, ILOILO – Gin-ako sang pamunu-an sang Caninguan National High School sa Lambunao, Iloilo nga indi perpekto ang pagpatigayon sang modular learning sa mga estdudyante.
Sa interview sang Bombo Radyo kay Dr. Jesus Insilada, Principal sang Caninguan National High School, iya ginpahayag nga daku nga pagpanghangkat para sa mga manunudlo ang production sang printed modules ilabi na nga problema ang internet connection kag ang signal sa Brgy. Caninguan kag sa kaiping nga mga barangay.
Suno kay Dr. Insilada, indi malikawan nga may yara sang kakulangan sa pagpatigayon sang modular learning apang nagatinguha man ang mga manunudlo agud nga mapalab-ot sa mga estudyante ang de-kalidad nga edukasyon.
Ginpahayag ni Dr. Insilada nga apisar sang mga pagpanghangkat nga dala sang pandemya, nagabuligay ang nagkalain-lain nga sektor sa banwa sang Lambunao rason nga nangin matalunsay ang una nga adlaw sang pagbukas sang klase sa nasambit nga eskwelahan.
