ILOILO CITY – Ipaagi na sang Social Security System sa PESONet ang paghatag sang pension agud nga mapadasig ang monthly crediting.
Ini ang paathag sang Social Security System may kaangtanan sa reklamo sang pensioners nga wala pa nakabaton sang ila monthly credit.
Sa interview sang Bombo Radyo kay Amiel Genova, SSS-Iloilo Acting Senior Communications Analyst, iya ginpahayag nga umpisa subong nga Oktubre, ang regular pensions ang igahatag paagi sa DBP disbursement facility nga Philippine Electronic Fund Transfer System and Operations Network (PESONet) kag DBP-accredited remittance transfer companies/cash payout outlets.
Suno kay Genova, ang pensioners ang makapili sa pagbaton sang monthly payout paagi sa ila account sa bisan diin nga PESONet participating bank kag e-wallet provider ukon cash pick-up via DBP cash padala.
Ginpahayag ni Genova nga sakop sang panibag-o nga monthly crediting ang retirement, death kag disability pension kun sa diin ang monthly pensions ang igahatag sa una nga adlaw sang bulan para sa mga pensioners nga may date of contingency nga halin sa una tubtub sa ika-15 nga adlaw sang bulan.
Ang ang monthly pension naman para sa mga pensioners nga may date of contingency nga ika-16 tubtub sa katapusan sang bulan ang gin-schedule sa ika-16 nga adlaw.
Para sa dugang nga kasayuran, mahimo man nga makapakig-angot sa pinakamalapit nga SSS local kag foreign branches ukon sa mobile app.
