ILOILO CITY- Ipasalo sang Pilipinas sa Korean Government ang funding para sa Panay-Guimaras-Negros bridge matapos nga nagback-out ang Chinese Government.
Sa interview sang Bombo Radyo kay Senate Minority Leader Franklin Drilon, iya ginpahayag nga siya mismo ang nagsugilanon sa Korean Eximbank nga amo man ang nagpondo sa Jalaur River dam project.
Suno kay Drilon, ginareview na subong sang Korean Government ang feasibility study nga ginhimo sang China para sa proyekto kag posible nga matapos ini sa katapusan sang Nobyembre subong nga tuig antes ipasa sa National Economic and Development Authority ukon NEDA para maaprubahan.
Pahayag ni Drilon, ang pagreview sang feasibility study ang may katuyuan nga busision ang tuman ka mahal nga P57B para sa proyekto nga suno kay Drilon, ginhungod sang China nga pamahalan agud nga malubong sa utang sa China ang Pilipinas.
Dugang pa sang Senador, mahal ang presyo sang proyekto bangud overdesigned ini sa diin indi man kinahanglan nga mangin 4-lanes gid ang nasambit nga taytay.
