ILOILO CITY – Nag-umpisa na ang pagpahamtang sang Christmas stars sa mga streetlight sa palibot sang syudad sang Iloilo may kaangtanan sa nagahilapit nga Yuletide season.
Ang nasambit nga inisyatibo ang ginatawag nga “Ilonggo Christmas Parol of Hope 2.0: Giving Light to Lives.”
Sa interview sang Bombo Radyo kay Iloilo City Mayor Jerry Treñas, iya ginpahayag nga may ginpaguwa na siya nga executive order kun sa diin ang nasambit nga proyekto ang pangunahan ni Philippine Chamber of Commerce and Industry (PCCI) Iloilo Chairman Dr. Sandra S. Gomez kaupod sanday PCCI Iloilo President Jobert Penaflorida, Treasurer nga si Maritess Lim, Auditor nga si Alma May Tayo, Board Member nga si Vincent Abellar kag PCCI Iloilo Secretary Yen de Felipe.
Suno kay Treñas, ang ceremonial lighting ang gintalana sa Nobyembre 14 kadungan sang Iloilo Market Market 2020 sa Nobyembre 13-15 sa SM City Iloilo Southpoint.
Ginpahayag ni Treñas nga katuyu-an sang trade fair amo nga mabuligan ang micro small and medium enterprises (MSMEs) nga gin-organisa sang PCCI Iloilo kag sang Iloilo City Government; Obra Ilonggo; Iloilo Hotels, Resorts & Restaurants Association kag Iloilo Festivals Foundation Inc.
Plano sang PCCI Iloilo nga i-reuse, i-recycle kag i-refurbish ang 500-600 ka lanterns nga igapahamtang sa Diversion Road sa Mandurriao, Gen. Luna St., Muelle Loney kag Calle Real sa City Proper.
Magluwas diri, nagpaguwa man sang executive order ang alkalde may kaangtanan sa pagpahamtang sang dekorasyon sa tagsa ka public plaza.
Ang lighting sang mga public plaza ang patigayunon sa Nobyembre 15.
