ILOILO CITY – Temporaryo nga siraduhon ang Department of Health Western Visayas Center for Health Development sa Lunes, Oktubre 19.
Santo sa abiso sang Department of Health Region 6, ang temporary closure ang patigayunon agud hatagan sang ligwa ang disinfection pagkatapos nga isa ka empleyado ang nagpositibo sa COVID-19.
Sa interview sang Bombo Radyo kay Dr. Jessie Glen Alonsabe, pinuno sang Regional Epidemiology and Surveillance Unit, iya ginpahayag nga ang COVID-19 positive nga empleyado ang isa ka babayi nga medical officer nga naka-quarantine humalin sang Oktubre 12 matapos nakabatyag sang mild symptoms.
Suno kay Alonsabe, Oktubre 16 na sang nagguwa ang positibo nga resulta sang RT-PCR test kag isa sa mga rason nga ginalantaw amo nga may yara sang namatyan sa balay sang medical officer kag mahimo nga isa sa mga nagbisita ang nakalaton sang virus.
Sa subong, anum na ka close contacts ang nakuhaan sang swab sample kag ginpaidalom na sa quarantine apang padayon sa gihapon ang contact tracing sa iban pa nga may posible exposure sa pasyente.
Ang operasyon sang Department of Health Western Visayas Center for Health Development ang magapadayon sa Oktubre 20 apang gin-athag ni Alonsabe nga indi maapektuhan ang pagpaguwa sang case bulletin.
Ginapanugyanan ang tanan nga magabisita sa nasambit nga talatapan nga dapat sundon ang ginapatuman nga minimum health protocol.
