UNITED KINGDOM – Nakabati ka na bala sang istorya nga may tawo nga naga-untat sa pagginhawa sa tion nga matulugan?
Kun wala pa, yari ang istorya sang 21 anyos nga si Liam Derbyshire sang United Kingdom, nga may kondisyon nga central hypoventilation ukon “Ondine’s Curse”.
Ini isa ka disorder nga naga-apekto sa pagginhawa ilabi na kun nagakatulog kag sa bilog nga kabuhi ni Liam, kinahanglan niya nga magtulog sa medical bed nga konektado sa life support system nga nagahatag sang oxygen sa baga kag nagamonitor sang vitals.
Magluwas diri, kinahanglan man nga may yara sang nagabantay kay Liam pananglitan nga malain nga matabo.
Suno sa iloy ni Liam nga si Kim, tuman na ka daku ang ila nagasto para sa electricity bills kag backup power sources agud nga maka-angkon sang normal nga kabuhi ang ila anak.
Ginpahayag ni Kim nga apisar sini, nakita nila kay Liam ang kalipay kag maayo nga paminatasan.
Ginakabig naman sang pamilya nga bonus ang kada adlaw nga nagakabuhi si Liam kag bisan ang mga doktor ang wala naglaum nga magalawig sang masobra sa duha ka dekada ang iya kabuhi.
