MANILA – Nagalaum ang mga Ilonggo nga Locally Stranded Individual nga yara sa Manila North Harbor Port, Inc. nga makapauli na sa labing madali nga tion.
Sa interview sang Bombo Radyo kay Mary Grace Escamilla sang Guimbal, Iloilo, iya ginpahayag nga 11 na sila ka adlaw nga nagatinir sa port kag naga-antos sa indi kumportable nga pagginawi.
Suno kay Escamilla, nakumpleto na nila ang requirements nga ginahingyo sang shipping company kag sa subong, ginahulat na lang ang approval sang Office of Civil Defense sa manifesto gikan sa Local Government Unit nga ila pauli-an.
Kun maaprobahan na, ang manifesto ang igapasa sa shipping company kag ang mga nakalista amo lang ang pahanugutan nga makasakay sa barko.
Nagpasalamat naman ang natungdan sa food allowance nga ginhatag sang Jaro Archdiocesan Social Action Center.
Ginpahayag naman ni Lorna Magnate sang Carles, Iloilo nga may yara na sila sang ticket apang tubtub subong, wala pa sila makapauli.
Sa pagkamatuod suno kay Magnate, nakahanda na ang Local Government Unit sang Carles sa ila nga pagpauli.
Sa subong suno kay Magnate, naga-antos sila anay sa pagtulog sa semento nga ginbutangan sang karton kag nagasalig sa donasyon nga pagkaon.
