SPRINGFIELD, MASSACHUSETTS – Mahimo nga makasuhan kag mapreso ang sin-o man nga madakpan nga nagapamakal sang boto kag nagapatigayon sang ballot box snatching sa Estados Unidos.
Suno kay Bombo International Correspondent Melanie Simmons, frontliner sa Springfield, Massachusetts, apisar sang mainit nga sitwasyon sa nagahilapit nga November 3 election, wala siya sang may nahibalu-an nga nagpatigayon sang illegal activities kasubong sang vote buying kag ballot box snatching.
Ginpahayag ni Simmons nga sa ila lugar, kalabanan ang supporter sang Democratic party apang indi man maulihi ang partido sang Republican.
Bangud sa COVID-19 pandemic, ginpahayag ni Simmons nga limitado lamang ang pagpatigayon sang mass gathering bangud sa ginapatuman nga minimum health protocol kag ang tanan nga Halloween activities ang ginkansela anay.
Apisar sini, amat-amat nga ginabuksan ang syudad sang Springfield agud hatagan sang ligwa ang political campaign sang mga kandidato ilabi na tunga nanday US President Donald Trump sang Republican kag sang Democrats nga si Joe Biden.
May yara naman sang option sa pagboto kag ini ang paagi sa pagpadulong sa polling centers ukon sa mail-in voting.
