ILOILO CITY – Mahimo nga may yara sang epekto ang pila ka bulan nga pagka-atrasar sang pagbukas sang klase bangud sa pandemya sa mental health sang mga estudyante.
Ini ang pahayag ni Dr. Lea Belleza, Public Information Officer sang Department of Education Region 6, may kaangtanan sa pila ka suicide incident sa probinsya sang Iloilo kun sa diin gina-angot sa module ang rason sang insidente.
Sa interview sang Bombo Radyo kay Belleza, iya ginpahayag nga indi man kun tani pag-itudlo ukon himuon nga rason nga ang problema sa pagsabat sa module ang nagatulod sa estudyante sa paghikog.
Suno kay Belleza, makabig nga “unfair” para sa Department of Education kun ang basulon amo ang ginapatigayon nga blended learning.
Ginpahayag ni Belleza nga mahimo nga ang pandemya ang may yara man sang negatibo nga epekto sa mental health rason nga importante ang bulig sang ginikanan paagi sa pagtatap kag pagpahangop sa ila kabataan.
Sa pagkamatuod suno sa natungdan, pareho lamang ang assessment nga ginapatigayon sa tanan nga sahi sang modality kag kun wala sang ikasarang ang ginikanan ukon ang himata sa pagtudlo, mahimo nga magpangayo sang bulig sa mga manunudlo ukon sa sin-o man nga may ihibalo.
