ILOILO CITY – Mas hugton sang Iloilo City Government ang pagpatuman sang intervention measures may kaangtanan sa COVID-19.
Nagpaguwa sang Executive Order 172 si Mayor Jerry Treñas para sa strict implementation sang quarantine intervention measures.
Sa interview sang Bombo Radyo kay Jeck Conlu, COVID-19 spokesperson sang Iloilo City Government, iya ginpahayag nga ang scope sang nasambit nga Executive Order amo ang mga nagpaidalom sa RT-PCR test, mga nagpositibo sa COVID-19, Locally Stranded individual (LSI), Returning Overseas Filipino (ROF) kag Authorized Person Outside Residence (APOR).
Suno kay Conlu, kinahanglan nga magpaidalom sa 14 ka adlaw nga quarantine ang mga nagpakuha sang swab sample para sa RT-PCR test tubtub nga magguwa ang resulta.
Ang mga nagnegatibo ang mahimo na nga makaguwa samtang para naman sa mga nagpositibo sa COVID-19, kinahanglan nila nga tapuson ang quarantine.
Para naman sa LSIs kag ROFs, mandatory man pagpaidalom sa 14-day quarantine kag RT-PCR test kun sa diin ang natungdan mismo amo ang magagasto para sa COVID-19 test.
Para sa APORs nga magatinir sa syudad sang Iloilo sa sulod sang isa ka semana ukon masobra pa, mandatory man ang pagpaidalom sa quarantine kag sa RT-PCR test kag kinahanglan nga ipasa sa Iloilo City Emergency Operations Center ang temporary address para sa monitoring.
Para sa LSIs, ROFs kag APORs nga nagpositibo, nakadepende sa assessment sang Barangay Health Emergency Response Team kun bala sa balay ukon sa facility sang syudad padayunon ang quarantine.
May yara naman sang nagakaigo nga penalty para sa mga madakpan nga wala nagasunod sa nasambit nga Executive Order santo sa Regulation Ordinance 2020-071 nga napetsahan sang Hulyo 7.
