ILOILO CITY – Nalubog sa tubig baha ang palibot sang syudad sang Iloilo kasunod sang pagbubo sang mamunog nga ulan subong nga gab-i, Oktubre 23.
Halos tagatuhod ang kataason sang tubig-baha sa mga dalanon kag bangud sini, madamo nga pasahero ang na-stranded.
Agud nga makahingagaw sa pagpauli, ang iban sa mga pasahero ang nagpasimpalad sa paglusong sa baha.
Sa City Proper area, kalabanan nga commercial establishments ang ginsulod sang tubig-baha.
Magluwas diri, ginsulod man sang tubig ang commercial establishments sa iban nga distrito sa syudad.
Sa bahin sang probinsya sang Iloilo, may pila ka mga banwa nga nalubog sa tubig-baha bangud sa mamunog nga ulan.
Halimbawa diri amo ang banwa sang Guimbal, Pavia kag Zarraga kun sa diin may mga commercial establishments kag government offices ang ginsulod sang tubig-baha.
Bangud sini, may mga salakyan nga naalangan kag wala na nag-andar samtang yara sa dalan.
Sa banwa sang Guimbal, ginabasol sang mga residente sa palyado nga drainage system ang pagbaha.
