ILOILO CITY- Patay ang isa ka manuggarab sang humay matapos nga naanod sa suba sa Napnapan Norte, Tigbauan, Iloilo.
Ang biktima amo si Roger Calamba, legal ang edad kag pumuluyo sang barangay Barusong sa amo nga banwa.
Sa interview sang Bombo Radyo kay Kagawad Tranquilino Tidor Jr. sang Napnapan Norte, iya ginpahayag nga hubog ang biktima sang nagtabok ini sa suba upod sa isa niya ka abyan.
Suno kay Tidor, bangud sa mabaskog nga daludo sang tubig, naanod gid ang biktima.
Nasapwan na lang ang bangkay sini nga wala na sang kabuhi sa baybay sa barangay Baguingin sa nasambit nga banwa.
