ILOILO CITY – Magasapol si Iloilo City Mayor Jerry Treñas sa mga tiglawas sang Department of Public Works and Highways (DPWH) kag sa City Engineer’s Office (CEO) sa masunod nga semana agud mahatagan sang solusyon ang pagluntad sang tubig-baha sa syudad sang Iloilo.
Ini ang kasunod sang natabo kagab-i, Oktubre 23, kun sa diin madamo ang na-stranded nga mga pasahero kag madamo nga commercial establishments ang ginsulod sang tubig-baha bangud sang mamunog nga ulan.
Sa interview sang Bombo Radyo kay Treñas, iya ginpahayag nga padayon pa subong ang pagreview sang duha ka nasambit nga talatapan kun ano ang nangin problema kag kun ngaa nadugayan antes nag-subside ang tubig sa kalabanan nga mga distrito.
May duha ka pumping stations suno kay Treñas kag sa subong gina-review pa kun ano ang dapat pauswagon.
Padayon man suno sa alkalde ang assessment sang City Disaster Risk Reduction and Management Office agud mahibaluan ang halit sang natabo kag kun ano pa ang dapat hatagan sang pagtamod.
Suno pa sa alkalde, hatagan man sang prayoridad sang syudad ang pagtutok sa sini nga problema agud malikawan ang water-borne diseases ilabi na subong nga onset sang La Niña.
