Ginahulat pa sang Western Visayas Transport Cooperative ang desisyon sang Department of Transportation (DOTr) may kaangtanan sa hingyo nga i-extend sa Marso 2021 ang consolidation sang kooperatiba kag korporasyon sa idalom sang PUV modernization.
Sa interview sang Bombo Radyo kay Mr. Raymundo Boyet Parcon, chairman sang Western Visayas Transport Cooperative, iya ginpahayag nga indi pa handa ang iban nga mga operator bangud sa financial capacity nga P20,000 kada unit.
Bangud nga may pandemya, tuman ka pigado ang kita sang mga salakyan kag indi ma dali-dali tipon ang P20,000 nga kinahanglanon.
Ang P20,000 ang magaserbe nga ‘show money’ ukon collateral sa diin ini ang idiretso sa banko.
Sa syudad sang Iloilo, siyam ka mga ruta pa lang ang na endorso nga handa na para sa consolidation.
Ang kada ruta ang may yara sang 15 ka units.
Nahibaluan nga sa Hunyo 30 na kuntani ang deadline para sa PUV modernization apang ini ang gin-extend bangud sa COVID-19 agud nga mahatagan man sang tion ang mga kooperatiba kag korporasyon nga ma-consolidate ang ila units.
