LEMERY, ILOILO – Nagalaum ang mga residente nga masolusyunan ang madugay na nga problema tuhoy sa tuman ka damo nga langaw sa Brgy. Nasapahan, Lemery, Iloilo.
Sa interview sang Bombo Radyo sa tagreklamo nga si Ernestina Quiro, iya ginpahayag nga tinuig na nila nga ginaproblema ang tuhoy sa tuman ka damo nga langaw.
Suno kay Quiro, lima ka bilog ang manukan sa ila lugar kun sa diin lakip sa mga nagapanag-iya amo sanday anay Punong Barangay Evelyn Gierra, Lester Araño, Punong Barangay Johnny Araño apang ang propidad ang nakapangalan sa iya utod kag ni Engr. Noel Sobremisana.
Ginpahayag ni Quiro nga apisar madugay na ang nasambit nga problema apang wala man sang may nagpangisog nga magreklamo.
Gin-athag sang natungdan nga wala nila ginahingabot ang manukan kundi luyag lamang nila nga masolusyunan ang problema tuhoy sa tuman ka damo nga langaw nga naga-apekto sa ila nga pagpangabuhi.
Sa patas nga pagwaragwag, bukas ang Bombo Radyo para sa pagpaathag sang nahingadlan nga mga tag-iya sang manukan kag lakip na sang alkalde sang banwa sang Lemery.
