ILOILO CITY – Ginakabig na nga terorista ang tanan nga naulamid sa red-tagging.
Sa pagpaathag sang Bombo abogado nga si Atty. Joenar Pueblo, ang red-tagging amo ang pag-label sa isa ka persona ukon organisasyon bilang “communist” ukon “terrorist” apisar sang ila actual beliefs ukon affiliations.
Suno kay Atty. Pueblo, kun sang una, ginatawag nga rebelde ang mga personalidad nga naulamid sa red-tagging apang sa subong, sila ang ginakabig na nga terorista bangud nga ang duag pula ang nagasimbolo sang CPP-NPA-NDF.
Ginpahayag ni Atty. Pueblo nga lakip sa mga konsekwensya amo nga daw kasubong nga wala na sang constitutional rights ang mga personalidad nga ginakabig bilang terorista bangud sa pagkontra sa gobyerno.
Apisar sini, may yara sa gihapon sang legal remedy ang mga personalidad nga gina red-tag kag ini amo ang writ of amparo kag writ of habeas data.
Ang writ of amparo amo ang remedyo para sa mga personalidad nga ang ila right to life, liberty kag security ang ginlapas sang unlawful act ukon omission sang public official, employee, private individual ukon entity samtang ang writ of habeas data naman amo ang remedyo para sa mga personalidad nga ginlapas ang ila kinamatarong paagi sa pagtipon sang impormasyon may kaangtanan sa ila nga pagkatawo.
