DUEÑAS, ILOILO – Ginakabig sang Philippine Drug Enforcement Agency nga daku nga accomplishment ang pagkadakop sa Punong Barangay sang Capuling, Dueñas, Iloilo.
Sa ginpatigayon nga buy bust operation, naglab-ot sa lima ka sachet sang suspected shabu nga nagabalor sang P13,600 ang nakuha gikan sa subject nga si Punong Barangay Ann Marsha Pojo.
Sa interview sang Bombo Radyo kay Jeanette Reyes sang Philippine Drug Enforcement Agency Region 6 kag team leader sa ginpatigayon nga buy bust operation, iya ginpahayag nga kapin sa duha ka bulan nga ginpaidalom sa monitoring ang nasambit nga Punong Barangay.
Suno kay Reyes, magluwas sa nasambit nga recoveries, nakuha man kay Pojo ang P1,000 nga buy bust money kag isa ka unit sang cellphone.
Ginpahayag ni Reyes nga natumod naman ang source nga ginakuhaan ni Pojo apang sa subong, indi pa ini mahimo nga mahingadlan.
Sa pagkamatuod suno sa natungdan, tanan nga barangay sa Dueñas ang drug-cleared na kag bangud nadakpan sa buy bust operation ang nasambit nga opisyal, pagabawi-on ang certification nga ginhatag sa Brgy. Capuling.
