ILOILO – Mas pasangkaron pa gid sang Philippine National Police ang kampanya batok sa illegal drugs kasunod sang pagkadakop sa isa ka Punong Barangay sa buy bust operation sa Capuling, Dueñas, Iloilo.
Sa interview sang Bombo Radyo kay Iloilo Police Provincial Office Director Police Col. Gilbert Gorero, iya ginpahayag nga apisar sang mabaskog nga kampanya sang gobyerno, may mga opisyal sa gihapon nga nagabaligya sang illegal drugs.
Suno kay Gorero, ginakasubo niya bilang IPPO Director nga mismo ang Punong Barangay sang Capuling sa banwa sang Dueñas ang wala nagasunod sa nasambit nga kampanya.
Ang natabo sa Capuling sa Dueñas suno kay Gorero ang nagapamatuod lamang nga indi dapat magkampanya ang tanan apisar nga gindeklarar na nga drug-cleared ang isa ka lugar kag sa baylo, dapat nga hatagan sang importansya ang multi-sectoral coordination.
May kaangtanan naman sa natabo nga pagluthang-patay sa isa ka mangunguma sa Brgy. Supa sa Tigbauan sang damlag lang, ginpahayag ni Gorero nga santo sa impormasyon, ang biktima ang ginakabig nga person of interest sa isa ka insidente.
Wala lang gindetalye sang IPPO Director kun paano naangot ang biktima bangud nga nagapadayon sa subong ang imbestigasyon.
Ginpahayag ni Gorero nga may yara sang presensya sang rebelde nga grupo sa lugar kun sa diin ginlambatan kag ginpaarakan sang luthang ang biktima nga si George Jutay.
