PASSI CITY, ILOILO – Magasentro sa mga mangunguma ang patigayunon nga Dugong Bombo 2020 sa Passi City sa Oktubre 28.
Mangin partner sang Bombo Radyo Philippines sa nasambit nga bloodletting activity ang Western Visayas Medical Center.
Sa interview sang Bombo Radyo kay John Aguilar, pinuno sang Advocacy Program kag Presidente sang Passi City Government Employees Association, iya ginpahayag nga apisar magasentro sa mga mangunguma ang nasambit nga bloodletting activity apang mahimo man sa gihapon nga makadonar sang dugo ang bisan sin-o nga interesado.
Suno kay Aguilar, sa tagsa ka bulan, may yara sang grupo nga amo ang ginahatagan sang atensyon bilang donor sa bloodletting activity sa syudad sang Passi kag ang bulan sang Oktubre ang gintigana gid para sa mga mangunguma.
Ginpahayag ni Aguilar nga antes makadonar sang dugo sa Oktubre 28, may yara sang blood screening sa Oktubre 27 agud masala na nga daan ang qualified donors.
Ang blood screening kag ang Dugong Bombo 2020 ang patigayunon sa Passi City Arena.
