ILOILO – Wala sang major damages nga na record sa probinsya sang Iloilo kasunod sang pagbubo sang mamunog nga ulan tuga sang Bagyo Quinta.
Santo sa record sang Provincial Disaster Risk Reduction and Management Office, as of October 26, 5:00 sang hapon, may pila ka landslide, nagkalatumba nga kahoy kag mga propidad nga nagkalaguba bangud sa epekto sang bagyo.
Magluwas diri, may pila man ka pamilya nga gin-evacuate kag may isa ka missing bangud sa baha.
Sa interview sang Bombo Radyo kay Dr. Jerry Bionat, pinuno sang PDRRMO, iya ginpahayag nga sa Fifth district, may na record nga pagbaha, nagkalaguba nga mga sakayang pandagat kag may isa ka persona nga missing.
Sa Third district, may na record nga pagbaha kun sa diin may mga pamilya nga gin-evacuate kag may nagkalatumba nga kahoy bangud sa buhawi.
Sa Second district naman suno kay Bionat, may na record nga landslide kag pagbaha kun sa diin may mga pamilya man nga gin-evacuate.
Sa First district, na record ang pagbaha bangud sa pag-ulan kag may mga pamalay nga nagkalaguba kasunod sang nagluntad nga buhawi.
Bangud sa pagtupa sang tuman ka munog nga ilan, ang water level sa mga suba ang nagtaas rason nga ang mga naga-istar sa low-lying areas ang ginpanugyanan nga mag-evacuate.
