ILOILO CITY – Indi pa sa gihapon matumod kun ano gid ang matuod nga rason sa natabo nga stabbing incident sa Brgy. Mansaya, Lapuz, Iloilo City.
Ang biktima amo si Melchor Jalandoni Jr., 35 anyos kag nagatrabaho sa isa ka gasoline station samtang ang suspek naman amo si Sherwin Billodres, legal ang edad kag ginapahayag nga may yara sang nervous breakdown.
Sa interview sang Bombo Radyo kay Barangay Tanod Bobit Cargason, iya ginpahayag nga yara siya sa sulod sang balay sang may nabati-an nga nagasinggitan nga may yara sang binun-anay nga natabo.
Suno kay Cargason, ang iban sa mga residente ang nagpang alang-alang nga magbulag sa duha bangud sa kakulba kun sa diin ginabanta nga nagalaba sang 12 ka pulgada ang kutsilyo nga gina-uyatan sang suspek.
Bilang Barangay Tanod, ginpahayag sang natungdan nga iya nga ginbulag ang duha kag nakita na lang nga duguon ang biktima apang indi lang niya matumod kun sa diin gid ang pilas sini.
Ginpahayag ni Cargason nga nabulag ang duha kag gilayon nga gindala sa hospital ang biktima.
Suno naman kay Allysa Bellodres, may yara sang nervous breakdown ang iya utod nga suspek.
Ginpahayag ni Bellodres nga nag-umpisa ang pagbatyag sang derpression sang iya utod sang ginbayaan sang iya asawa.
Humalin sadto, regular nga nagapabulong ang iya utod apang bangud sa COVID-19, na-untat ang treatment kag mahimo nga ini ang rason sang iya nga pagpamuno.
Gina-ako naman sang natungdan nga nakabuhat sang sala ang iya utod.
