ILOILO CITY – Madamo ang naghingagaw sa pagdu-aw sa ila minatay antes ang pagsirado sa tanan nga patyo sa syudad sang Iloilo umpisa Oktubre 30 tubtub Nobyembre 2.
Masako na ang pagpaninlo sa mga pantyon apang sa pagsulod pa lang sa patyo, istrikto nga ginapatuman ang minimum health protocol kun sa diin may yara sang presensya sang mga pulis kag mga barangay tanod.
Sa bahin sang Arevalo Public Cemetery, isa si Agape Love Rubin sa mga temprano pa nga nagduaw kun sa diin iya ginpahayag sa Bombo Radyo nga tuman ang kinalain sang pagdumdom sang Pista Minatay subong nga 2020 kun ipaanggid sa mga nakaligad nga tinuig.
Suno kay Rubin, naandan na nga sa tagsa ka Nobyembre 1 kag Nobyembre 2 ang pagbisita sa patyo apang bangud sa pandemya, ini ang nagbag-o.
Ginpahayag ni Rubin nga indi lamang ang pagpadulong sa patyo ang apektado kundi lakip man ang mga negosyante sang bulak kag kandila.
