ILOILO CITY – Wala-tuo nga paghaboy sang basura ang isa sa ginatudlo sang City Environment and Natural Resources Office nga rason sang pagbaha sa palibot sang syudad sang Iloilo.
Sa interview sang Bombo Radyo kay Engr. Noel Hechanova, pinuno sang City Environment and Natural Resources Office, iya ginpahayag nga ang in-charge sa maintenance sang drainage system amo ang Iloilo City District Engineering Office kag nagahatag lamang sang asssistance ang CENRO.
Suno kay Engr. Hechanova, santo sa ginpatigayon nga inspection, tuman ka damo nga basura ang yara sa drainage system kag indi lamang common household wastes ang nagalinapta kundi may mga higko man nga naghalin sa talyer.
Sa pagkamatuod suno kay Engr. Hechanova, may isa ka talyer nga ginhatagan na sang citation ticket bangud sa paglapas sa Anti-Littering Ordinance apang tuman pa ka damo ang nagalapas sa nasambit nga ordinansa.
Ginpahayag sang natungdan nga mahimo gid nga hatagan sang citation ticket ang nagahaboy sang basura sa indi designated area apang ang problema amo nga wala man nagapadakop ang violators.
Santo naman sa assessment sang Iloilo City District Engineering Office, ang pag-ulan nga na-eksperyensyahan sa syudad kag probinsya sang Iloilo sang damlag lang tuga sang Bagyo Quinta ang pinakamabaskog kag may pinakamalawig nga duration.
Sa interview sang Bombo Radyo kay Engr. Rodney Gustilo, pinuno sang nasambit nga talatapan, iya ginpahayag nga nagtaas ang lebel sang tubig sa flood control project kag sa mga mayor nga suba bangud sa tuman ka baskog nga ulan.
Suno kay Engr. Gustilo, isa man sa mga rason sang pagbaha amo ang wala pa natapos nga proyekto ilabi na sa City Proper area kun sa diin wala nasarangan sang existing drainage system kag pumping stations ang volume sang tubig.
Bangud sini, ginhingyo sang natungdan ang kooperasyon sang tanan ilabi na sa waste disposal nga isa man sa mga rason sang pagbaha.
