ILOILO CITY – Kabahin lamang sang cover story ang paggamit sang alyas kag lain nga impormasyon.
Ini ang panindugan ni Jeffrey Celis ukon Ka Eric Almendras sa akusasyon ni Lean Porquia nga anak sang ginpatay nga aktibista nga si Jory Porquia.
Sa exclusive interview sang Bombo Radyo kay Celis, iya ginpahayag nga reference lamang ang paggamit niya sang alyas kag iban pa nga impormasyon kag ang iya nga pagka-ulamid sa narcolist ang kabahin lamang sang government project.
Sa baylo, ginbalik ni Celis ang akusasyon kun sa diin, iya nga gin-akusaran ang iloy kag ang bug-os nga pamilya ni Porquia nga kabahin sang CPP-NPA-NDF.
Para naman kay Lean Porquia, kredibilidad kag integridad ang pinaka-importante.
Ginpahayag ni Porquia nga kun matuod nga kabahin sang CPP-NPA-NDF ang iya pamilya, kinahanglan nga pamatud-an ini ni Celis sa korte.
Sa baylo nga maakig, nagpahayag sang kaluoy si Porquia bangud suno sa iya, may yara sang Paranoia si Celis.
Ginpanindugan naman ni Celis nga indi na niya kinahanglan pa nga ipaathag sa publiko ang tuhoy sa iya kredibilidad.
Sa baylo, si Porquia ang dapat nga magsabat sang matuod tuhoy sa koneksyon ang iya pamilya sa CPP-NPA-NDF kag kun nga-a indi niya mabatas nga pakamala-uton ang kalakasan nga ginahimo sang rebelde nga grupo.
Apisar sang mga akusasyon nga ginbuy-an ni Celis, ginpahayag naman ni Porquia nga indi niya kinahanglan nga magpaathag kun nga-a wala niya ginapakamalaot ang ginahimo nga kalakasan sang CPP-NPA-NDF.
Ginpanindugan ni Porquia nga ang dapat lamang nga basehan sang publiko amo ang ugat sang tanan kag ini amo ang kredibilidad kag integridad ni Celis.
