ESTANCIA, ILOILO – Wala sang criminal record ang lima ka miyembro sang pamilya Torrico nga suspek sa pagwasay kag pagbuno sa ila duha ka kasimaryo sa Zone 2, Poblacion, Estancia, Iloilo.
Sa interview sang Bombo Radyo kay Punong Barangay Jun-Jun Lomugdang, iya ginpahayag nga apisar nga ginapatu-patuan ang pamilya Torrico nga nagpangawat apang wala sila sang malain nga record sa barangay.
Suno kay Lomugdang, mahimo nga daan nga hiligut-anon nga nagresulta sa pagbayluhanay sang malain nga tinaga ang rason kun nga-a ginwasay kag ginbuno sang mga suspek nga sanday Nelson Torrico Sr., 64 anyos kag Nelson Torrico Jr., 29 anyos ang mga biktima nga sanday Jeffrey Corvera, 46 anyos kag Ryan Villaluna, 31 anyos.
Ginpahayag ni Lomugdang nga ang mga biktima ang lunsay job hire sang Local Government Unit sang Estancia kun sa diin si Corvera ang naka-angkon sang patal nga pilas sa tangkugo, likod, ulo kag dughan samtang pilas sa likod, dughan kag ulo naman ang naangkon ni Villaluna.
Matandaan nga ginbawi-an sang kabuhi si Corvera samtang pilason naman si Villaluna matapos ginsulong kag ginpulihan sang mag-amay nga Torrico.
Naulamid naman sa ginpasakaan sang kaso nga murder ang tiayon nga si Jocelyn, 60 anyos kag mga kabataan nga sanday Nel John, 30 anyos kag Niel, 25 anyos bangud sa pagpakighimbon sa krimen.
