LEGANES, ILOILO – Ginatugyan sang mga barangay official sa eksperto ang pag-imbestigar kun nga-a nakuryente-patay ang mag-iloy sa Brgy. San Vicente, Leganes, Iloilo.
Sa interview sang Bombo Radyo kay Punong Barangay Ching Vallejo, iya ginpahayag nga ang streetlight kun sa diin naangot ang linya sang kuryente ang ginapanag-iyahan sang barangay kag indi sang Local Government Unit sang Leganes.
Suno kay Vallejo, natukiban nga may yara sang nag-tap sa linya sang streetlight nga mahimo nagresulta sa overloading.
Ginpahayag ni Vallejo nga isa man sa factor sang pag-igrab sang linya sang kuryente amo ang pagtupa sang ulan sang nakaligad nga inadlaw.
Nahibalu-an nga nagapahuway ang mag-iloy sa sulod sang ila balay sang nag-igrab ang linya sang kuryente sang streetlight kag nahulog sa atop.
Tuyo pa kun tani sang iloy nga lantawon kun ano ang natabo apang nakasandad siya halayan sa kusina samtang ginakungkong ang iya nga anak.
Ang halayan nga nasandaran sang iloy ang nagaangot sa atop sang balay kun sa diin nagtupa ang linya sang kuryente.
