PENNSYLVANIA, USA – Ginlaslasan ni Pennsylvania Gov. Tom Wolf si incumbent US president Donald Trump.
Ini ang kasunod man sang pagpasaka sang reklamo ni Trump sa Korte Suprema agud pauntaton ang isipay sang balota US elections sa tunga nila ni presidential candidate Joe Biden.
Nahibaluan nga lakip ang Pennsylvania sa mga estado sa America nga ginpa-untat ang botohay.
Suno kay Wolf, isa ka sahi sang pagpangbastos ang ginhimo ni Trump.
Ginpasalig man ni Wolf nga protektahan ang kada boto sang taga Pennsylvania.
Nahibaluan nga ang Pennsylvania ang may 20 ka electoral votes.
Nagdangat naman sa 89% ang naisip na nga boto sa Pennsylvania sa diin nagapanguna si Trump nga may 50.7%, 48.1% kay Biden kag 1.2% pa ang wala na nabilin nga boto.
Magluwas sa Pennsylvania, lakip man sa mga estado sa America nga wala nakapagwa sang resulta sa electoral votes amo ang Nevada nga may anom ka electoral votes, Alaska nga may tatlo ka electoral votes, Georgia nga may 16 ka electoral votes, kag North Carolina nga may 15 ka electoral votes.
Sa impormasyon nga nakuha sang Bombo Radyo Iloilo sa mga international correspondent sa 50 ka estado sa America kag sa district of Columbia, nagapanguna sa gihapon si Biden sa electoral votes nga may 264 ukon kabug-usan nga 72,102,585 ka popular votes.
Samtang, may 214 naman ka electoral votes si Trump ukon 68,637,070 ka popular votes.
