TIGBAUAN, ILOILO – Ginpaarakan luthang ang lalaki nga nagdeliver lang sang softdrinks sa Barangay Cansilayan, Tigbauan, Iloilo upod ang iya live in partner sakay sa tricycle.
Ang biktima amo si Joseph Jutay, 39 anyos kag residente sang Supa, Tigbauan.
Sa interview sang Bombo Radyo kay Analisa Paragsa, live in partner sang biktima, iya ginpahayag nga samtang nagamaneho si Jutay, gilayon nga may nagguwa nga anom ka mga lalaki nga naka-bonet kag gintiro ang goma sang ila tricycle.
Suno kay Paragsa, ginapalapitan sila sang mga lalaki kag nagdeklara sang hold up.
Nakuha sang mga suspek ang bag sang babaye lakip diri ang kwarta kag iya cellphone.
Gilayon nga gintiro si Jutay sa likod nga bahin samtang ginmanduan nila ang babaye nga magdalagan kag magpalagyo bangud kun indi, pati siya ang tiruhon man.
Bangud sa patal nga pilas nga naangkon sa ulo kag likod, wala na natabangan pa ang biktima.
