ILOILO CITY-Naghatag na sang ‘last warning’ ang Local Government Unit sang Dueñas, Iloilo sa tanan nga quarry operators sa banwa kasunod sang reklamo sang mga pumuluyo nga pagkaguba sang dalan nga ginalabayan sang mga truck nga nagahakot sang balas.
Sa interview sang Bombo Radyo kay Dueñas Mayor Mamerto Pelopero, iya ginpahayag nga ipauntat niya ang tanan nga quarry operations sa banwa sa tion nga may magreklamo pa nga residente.
Suno kay Pelopero, hatagan niya sang kahigayunan ang mga quarry operators kag mga haulers nga kay-uhon ang dalan nga ginareklamo sang mga pumuluyo sang kapin 10 ka mga barangay halin sa Capuling padulong sa Cabudian.
Pahayag pa sang alkalde, kinahanglan nga mintinaron ini sang mga quarry operators kag sa tion nga sila ang mapaslawan, hingyuon sang alkalde sa Iloilo Provincial Government nga maghimo sang moratorium sa pagpauntat nalang sang operasyon.
Gin-ako man niya nga natak-an na siya sa promisa sang mga quarry operators gani ulihi na ini nga tsansa ang iya ihatag sa ila.
Sa subong suno sa alkalde, may yara sang 16 ka mga quarry permittees sa banwa apang 12 lang ang aktibo nga amo man ang ginareklamo sang mga pumuluyo.
Suportado naman ni Iloilo Governor Arthur Defensor Jr. ang plano sang alkalde nga pauntaton ang mga quarry operators sa tion nga magpadayon sila sa pagpasaway kag pagpabaya sa ila katungdanan.
Suno sa gobernador, hulaton nalang niya ang ipasaka nga reklamo sang alkalde batok sa mga quarry operators.
Gin-athag naman niya nga nagabantay man ang provincial government sa mga operators sang quarrying nga nagalapas sa layi.
