ILOILO CITY- Nangin isa na ka laye ang hagna nga nagaduso sang pagdugang sang bed capacity sang Western Visayas Medical Center sa Mandurriao, Iloilo City gikan sa 425 pasaka sa 700.
Sa interview sang Bombo Radyo kay Iloilo City Lone District Representative Jamjam Baronda, iya ginpahayag nga isa ang RA 11496 sa pito ka mga local hospital bills nga nagatuyo nga mapasanyog ang delivery sang health care services sa tunga sang pandemya nga ginpirmahan ni Presidente Rodrigo Duterte.
Suno kay Baronda, ang nasambit nga laye ang maga-provide man sang pag-upgrade sang professional health care services kag pasilidad sang ospital kag i-authorize man ang pagdugang sang numero sang mga medical personnel.
Ginpahayag man ni Baronda nga gamay nalang ang kulang nga infrastructure project sa Western Visayas Medical Center agud nga matigayon ang pagdugang sang bed capacity sa diin 275 ang idugang.
Nagalaum naman ang kongresista nga mapadasig ang paghatag sang pondo agud nga matigayon na ang mga kinahanglan nga asikasuhon.
