ILOILO CITY – Napasakaan na sang kaso ang mga suspetsado nga nag hold up sa Chinese national sa Florenceville Townhouses sa Dulonan, Arevalo.
Ang biktima amo si Li Wenqian, 39 anyos sang Fujian, China.
Samtang ang mga suspek naman amo sanday Jo-An Lego, 40, kag Rowen Libuna, 22, lunsay residente sang Lambunao, Iloilo.
Sa exclusive interview sang Bombo Radyo kay Police Major Edgar Anonoy, hepe sang Arevalo Police Station, iya ginpahayag nga kaso nga robbery kag carnapping ang ginpasaka sa duha ka mga suspek sa City Prosecutor’s Office.
Suno kay Anonoy, nakit-an sa Close Circuit Televison (CCTV) camera ang mga suspek nga nagbilin sang L300 van nga ginapanag-iyahan sang biktima sa Pakiad, Oton, Iloilo.
Matapos sini, nakit-an ang duha ka mga suspek nga nagpadulong sa Hibao-an Norte, Mandurriao, Iloilo City.
Diri, kag nagsakay sila sa taxi padulong sa banwa sang Calinog, Iloilo.
Ginkumpirma man sang hepe nga may mga kaso na nga carnapping, theft kag robbery sanday Lego kag Libuna.
Matandaan, nga naulamid man ang duha ka mga suspek sa natabo nga twin robbery sa banwa sang Dingle, Iloilo sang Pebrero subong nga tuig.
