ILOILO CITY – Wala sa gihapon natumod ang iloy nga naghaboy sang fetus sa Calajunan Sanitary Landfill sa Barangay Calajunan, Mandurriao, Iloilo City.
Nahibaluan nga sa Tacas, Jaro, Iloilo City ang ginatudlo sang General Services Office nga ginhalinan sang truck kun sa diin ginkarga ang ginabanta walo ka bulan nga lapsag nga babayi kag ginhaboy sa dumpsite.
Sa exclusive interview sang Bombo Radyo kay Punong Barangay Joseph Poral, iya ginpahayag nga 26 sa ila rekord ang nagabusong nga mga babayi sa ila lugar, apang 11 sa sini nga numero ang subong nagadala sang 7-8 ka bulan nga lapsag.
Suno kay Poral, negatibo nga sa ila nga barangay naghalin ang nasambit nga fetus.
Subong nga bulan sang Nobyembre, tatlo na ka lapsag ang ginpanghaboy sa Calajunan Sanitary Landfill kag lunsay wala nakilal-an kun sin-o ang mga ginikanan.
